Nuorttarijkalasj aktisasjbarggo sosiálapolitihkalasj ássjijn iemeálmmukperspektijvajn la buorre buojkulvis nuorttarijkalasj ávkken. La sáhka viehka unna juohkusijs, rijkajn gånnå viehká álu juohki hásstalusájt vuorastuvvam álmmugijn, barggij vánesvuodajn ja vijdes geográfalasj gaska.

Nuorttarijkaj aktisasjbarggo demænssaássjijn, dav mav Nuorttarijkaj álkkádusguovdásj koordineri, la vuosedam dárbbo la åttjudit máhttovuodov, systematiserit vásádusáj lånudallamav ja arienáv tsieggit gånnå dágástallá mij la buorre sujtto ja hukso sámijda ja inuihtajda gejna la demænssa. Vájllu dutkam ja evidænssavuodo mij guosská sujttuj ja huksuj sámijs ja inuihtajs majna la demænssa, valla sihke Suoman, Vuonan, Svierigin ja Ruonáednamin li muhtem dåjma ja dutkamprosjevta jådon.

Dán diedádusán lip gávnadimijt ja oajvvadusájt tjoahkkim ma båhtin juogosbargos vuostasj nuorttarijkalasj konferánsas man fádda lij iemeálmmuga ja demænssa. Konferánssa lij Staaren (Östersund) tjavtjan 2018 ja ásadiddje lidjin Nuorttarijkaj álkkádusguovdásj, Region Jämtland Härjedalen ja sáme ávvojahke Staare 2018.  Loahppabåhtusijda ja oajvvadusájda gulluji duola degu makkir praktihkalasj dåjma ja rievddadusá li dárbulattja vaj ulmutja iemeálmmukduogátjijn ja demensajn lulun máhttet buorep dårjav ja dievnastusáv nuorttarijkalasj suohkanijn oadtjot, man láhkáj máhttep máhtojt suohkanij juohket ja lenaj/fylkaj rastá, jali man láhkáj ådå diedojt praktihkalattjat implementieri. Barggojuohkusa vuojno li Nuorttarijkaj álkkádusguovdátjis tjoahkkiduvvam, valla dajn ælla vuorodime jalik ávttjimusá mijá bieles.

Nuorttarijkaj álkkádusguovdátja barggogåhttjom la doarjjot álkkádusåvddånahttemav Nuorttarijkajn navti jut tjoahkki ja juogat diedojt ja dahká arienájt værmádagájda ja dutkamaktisasjbargon. Gidá jagen 2019 vuododuváj nuorttarijkalasj værmádahka iemeálmmugij ja demænssaj, danna oassálassti oajválattja, dutke ja bargge sujtto- ja huksoámmádijn Suoman, Vuonan, Svierigin ja Ruonáednamin.

Dát diedádus la ájádaláduvvam liehket vuodon dágástallamijn gåktu vuorodit nuorttarijkalasj aktisasjbargov iemeálmmugijn ja demensajn, ja bájkálasj ja sisrijkalasj dágástallamijda dåjmaj birra suohkanij ja nasjonála dásen. Váj galggá oajvvadusáj duogátjav dádjadit de diedádus álgaduvvá tjielggimijn máhttodiles iemeálmmugij ja demensa birra.